Rom 12 | NdeIBE | STEP | Ngakho-ke, ngiyalincenga bazalwane, ngenxa yomusa kaNkulunkulu, ukuba linikele imizimba yenu njengemihlatshelo ephilayo, engcwele lemthokozisayo uNkulunkulu

Romans 12

Imihlatshelo Ephilayo

1 Ngakho-ke, ngiyalincenga bazalwane, ngenxa yomusa kaNkulunkulu, ukuba linikele imizimba yenu njengemihlatshelo ephilayo, engcwele lemthokozisayo uNkulunkulu – okuyikukhonza kwenu ngomoya.

2 Lingavumi futhi ukulingisa umhlaba lo, kodwa liguqulwe ngokwenziwa kwengqondo yenu isibantsha. Lapho-ke lizakwenelisa ukuhlola lokwamukela lokho okuyintando kaNkulunkulu – intando yakhe elungileyo, ethokozisayo lepheleleyo.

3 Ngoba ngomusa engiwuphiweyo ngithi kini lonke: Lingacabangi ngokuzazisa kakhulu okudlula okufaneleyo, kodwa lizicabangele ngokuqonda, ngokumayelana lesilinganiso sokukholwa uNkulunkulu aliphe khona.

4 Njengalokhu omunye lomunye wethu elomzimba owodwa olezitho ezinengi, njalo izitho lezi zonke kazenzi msebenzi munye,

5 Ngokunjalo kuKhristu thina abanengi sibumba umzimba owodwa, njalo ilunga ngalinye ngelalawo wonke amanye. 6 Silezipho ezehlukeneyo, kusiya ngomusa esawuphiwayo. Uma isipho somuntu siyikuphrofetha, kasisebenzise ngokulingana lokukholwa kwakhe. 7 Uma siyikukhonza, kakhonze: uma siyikufundisa, kafundise; uma siyikukhuthaza, kakhuthaze, 8 uma siyibukhokheli, kabuse ngokukhuthala; uma siyikubonakalisa umusa, kakwenze ngokuthokoza.

Uthando

9 Uthando kumele lube qotho. Zondani okubi libambelele kokulungileyo. 10 Zimiseleni omunye komunye ngothando lobuzalwane. Hloniphanani okudlula ukuzihlonipha kwenu.

11 Lingaphelelwa yikutshiseka, kodwa gcinani ukutshiseka kwenu komoya, likhonza iNkosi. 12 Thokozani ekwethembeni, libekezele ekuhlukuluzweni, libambelele ekukhulekeni.

13 Bapheni abantu bakaNkulunkulu abaswelayo. Zejwayezeni ukuphana.

14 Babusiseni labo abalihluphayo; busisani lingaqalekisi. 15 Thokozani lalabo abathokozayo, lilile lalabo abalilayo. 16 Hlalisanani ngokuzwana. Lingazigqaji, kodwa lihlanganele labantukazana. Lingazikhukhumezi.

17 Lingaphindiseli muntu okubi ngokubi. Nanzelelani ukwenza okulungileyo phambi kwabantu bonke. 18 Uma kusenzakala, kusiya mayelana lokubona kwenu, hlalani ngokuthula labantu bonke. 19 Lingaphindiseli, bangane bami, kodwa litshiyele ulaka lukaNkulunkulu ithuba, ngoba kulotshiwe ukuthi: “Ukuphindisela ngokwami; ngizaphindisela,” kutsho iNkosi.

20 Esikhundleni salokho: “Uma isitha senu silambile, sipheni ukudla; uma somile, sinikeni okunathwayo. Ngokwenza lokhu, lokhela amalahle avuthayo ekhanda laso.”

21 Linganqotshwa ngokubi, kodwa nqobani ububi ngobuhle.